Ընտրական օրենսգրքում փոփոխությունների մասին կարելի է խոսել միայն Սահմանադրական բարեփոխումների ամբողջական փաթեթից հետո։ Այս մասին այսօր՝ մայիսի 26-ին, Ազգային ժողովում բյուջեի կատարողականի քննարկումից հետո լրագրողներին ասաց Կենտրոնական ընտրական հանձնաժողովի նախագահ Տիգրան Մուկուչյանը։
«Եթե Սահմանադրական բարեփոխումներից հետո կարիք կլինի փոփոխել Ընտրական օրենսգրքի այս կամ այն դրույթը, ապա օրենսգրքի փոփոխությունն անխուսափելի կլինի։ Հակառակ դեպքում, բնականաբար փոփոխություններ չեն լինի»,- ասաց Տիգրան Մուկուչյանը։
Ինչ վերաբերվում է Սահմանադրական բարեփոխումներին, ԿԸՀ նախագահն ընդգծեց, որ ինքը գնահատական տալ չի կարող, քանի որ ընտրություններ եւ հանրաքվեներ կազմակերպող, անցկացնող եւ վերահսկող մարմին է։