Ազգային ժողովի ՀԱԿ խմբակցության պատգամավոր Նիկոլ Փաշինյանն այսօր՝ մայիսի 26-ին, 2014 թվականի պետական բյուջեի կատարողականի քննարկման սկզբում հետաքրքրվեց, թե ինչու ներկա չեն Սյունիքի մարզպետ Սուրիկ Խաչատրյանն ու Երեւանի քաղաքապետ Տարոն Մարգարյանը:
«Ես սկսում եմ հավատալ, որ Հայաստանում գոյություն ունեն առաջին եւ երկրորդ սորտի պաշտոնյաներ, եւ առաջին սորտի պաշտոնյաներն այսպիսի քննարկումների չեն գալիս։ Ինձ հետաքրքիր է՝ ուր են նրանք»,- ասաց Նիկոլ Փաշինյանը, ինչին հանձնաժողովի անդամները հակադարձեցին, թե այդ հարցը ընդդիմադիր պատգամավորը կարող է բարձրացնել, երբ քաղաքապետարանի եւ մարզպետարանի աշխատակիցները հաշվետվությունը կներկայացնեն։
Նշենք, որ այսօր նախորդ տարվա հաշվետվություններն են ներկայացնում մարզպետները։ Բացի Սյունիքի եւ Արարատի մարզպետներից՝ մյուսները ներկա են։
Մինչեւ քննարկումը սկսվելը, ՏԿԱԻՆ նախարար Արմեն Երիցյանը լրագրողների հետ զրույցում հայտարարեց, որ Սյունիքի մարզպետի «սիրտը վատ է», խնդրել է նիստին ներկա չգտնվել, իսկ Արարատի մարզպետը գործուղման մեջ է։