Ավստրիական Սանկտ Պյոլտեն քաղաքի դատարանը մեղադրական դատավճիռ է կայացրել 14-ամյա պատանու գործով, որին կասկածում էին ահաբեկչական խմբավորմանն անդամակցելու եւ ահաբեկչություն նախապատրաստելու մեջ:
ՏԱՍՍ-ի փոխանցմամբ, երկար ժամանակ Վիեննայում բնակվող Թուրքիայի անչափահաս քաղաքացին ատենակալների կոլեգիայի կողմից դատապարտվել է 2 տարվա ազատազրկման՝ առանց 8 ամսվա ընթացքում ժամկետից շուտ ազատ արձակման հնարավորության: Հաշվի առնելով մեղադրյալի տարիքը՝ դատավարությունն անցկացվել է դռնփակ: Փաստաբանի խոսքով, մեղադրյալն ընդունել է մեղքը:
Դատախազության տեղեկացմամբ, պատանին «Իսլամական պետություն» ահաբեկչական խմբավորման համացանցային քարոզչության զոհ է դարձել: Տղայի մոտ ցանկություն է առաջացել մեկնել Սիրիա եւ կռվել զինյալների օգտին, ինչն իրականացնելու համար նա սկսել է անհրաժեշտ կապեր փնտրել Վիեննայում: Երբ նրան հասկացրել են, որ կարող է պայքարել հենց Ավստրիայում, նա սկսել է համացանցում պայթուցիկ սարքերի ստեղծման ուսումնական ձեռնարկներ փնտրել: Ենթադրվում է, որ նրա թիրախը պետք է Վիեննայի Արեւմտյան կայարանը դառնար:
