Ամերիկյան Հյուսիսային Դաքոթայի նահանգի Գրանդ Ֆորքս քաղաքում տեղի ռազմաօդային բազայի զինծառայողը Wal-Mart խանութում կրակ է բացել, որի հետեւանքով մահացել է երկու մարդ, այդ թվում զինծառայողը: Եվս մեկ մարդ տեղափոխվել է հիվանդանոց: Տեղի լրատվամիջոցների փոխանցմամբ, միջադեպը տեղի է ունեցել մայիսի 26-ին, գիշերը ժամը 01.00-ի սահմաններում:
Ոստիկանության փոխանցմամբ, կրակողը եղել է 21-ամյա Մարքել Ուիլիսը: Նա ծառայում էր «Գրանդ Ֆորքս» ռազմաօդային բազայում:
Հաղորդվում է, որ Ուիլիսը մտել է խանութ ու կրակել եւկու անձանց վրա՝ 63-ամյա տղամարդու եւ 47-ամյա կնոջ: Դրանից հետո նա փորձել է կրակել նաեւ խանութի աշխատակցի վրա, բայց վրիպել է: Միջադեպն ավարտվել է նրանով, որ Ուիլիսը կրակել է նաեւ իր վրա: Նրան տեղափոխել են հիվանդանոց, որտեղ էլ մահացել է:
Տեղի ունեցածի պատճառների մասին ոչինչ հայտնի չէ: