Լեհաստանի նորընտիր նախագահ Անջեյ Դուդան դուրս է եկել նախկին վարչապետ Յարոսլավ Կաչինսկիի գլխավորած ընդդիմադիր «Օրենք եւ արդարություն» կուսակցությունից, որը նախագահի պաշտոնում առաջադրել էր իր թեկնածությունը:
«Ինձ համար բնական է, որ եթե դու դառնում ես նախագահ, այլեւս որեւէ կուսակցական գործունեություն չի կարող լինել»,-ասել է Դուդան եւ հավելել, որ ինքը ցանկանում է լինել բոլոր լեհերի նախագահը, ոչ թե միայն կուսակցության անդամների, հաղորդում է RBK-ն՝ վկայակոչելով Dziennik Baltycki-ն:
Հիշեցնենք, որ Լեհաստանի նախագահական ընտրությունների երկրորդ փուլը տեղի է ունեցել մայիսի 24-ին, որտեղ Դուդան հավաքել է 51,55 տոկոս ձայն, իսկ գործող նախագահ Բրոնիսլավ Կոմորովսկին՝ 48,45 տոկոս ձայն:
Ընտրություններից հետո առաջին օրը Դուդան դուրս է եկել փողոց եւ մետրոյի մուտքի մոտ, ամենաբանուկ հատվածում սկսել է անցորդներին սուրճ բաժանել:
Լեհաստանի նախագահի երդմնակալության արարողությունը տեղի կունենա օգոստոսի 6-ին: