Մայիսի 26-ին Երեւանում անցկացված Արեւելյան Գործընկերության հանրային կառավարման բարեփոխումներին նվիրված «Քաղաքացիական ծառայության արդյունավետության բարձրացում. ընդհանուր գնահատման համակարգ եւ շարունակական կրթություն» թեմայով համաժողովին ելույթով հանդես եկավ ՀՀ ԱԳ նախարարի տեղակալ Կարեն Նազարյանը: Նա կարեւորեց քաղծառայության դերը հանրային կառավարման համակարգի արդյունավետ գործունեության հարցում` նշելով, որ ԵՄ հետ համագործակցությունն անցնող տարիների ընթացքում նպաստել է մի շարք ոլորտներում բարեփոխումների իրականացմանը:
Համաժողովին, որը կազմակերպվել էր ՀՀ քաղաքացիական ծառայության խորհրդի կողմից` ԵՄ եվրոպական արտաքին հարաբերությունների ծառայության հետ համագործակցությամբ, մասնակցում էին Հայաստանի, Վրաստանի, Բելառուսի, Մոլդովայի, Ուկրաինայի, ինչպես նաեւ ԵՄ անդամ երկրների քաղաքացիական ծառայության եւ համապատասխան ոլորտների բարձրաստիճան ներկայացուցիչներ եւ փորձագետներ: