Հունիսին օդի ամսական միջին ջերմաստիճանը կանխատեսվում է նորմայի սահմաններում: Այս մասին այսօր՝ մայիսի 27-ին, լրագրողներին ասաց ՀՀ ՏԿԱԻՆ հիդրոմետ ծառայության օդերևութաբանության կենտրոնի պետի տեղակալ, աշխարհագրական գիտությունների թեկնածու Գագիկ Սուրենյանը:
«Հունիսը հանրապետության տարբեր հատվածներում տարբեր կերպ կարտահայտվի՝ հյուսիսային եւ կենտրոնական շրջաններում տեղումների քանակը սպասվում է նորմայի սահմաններում, միայն Վայոց Ձորում եւ Սյունիքում տեղումների քանակը կլինի նորմայից պակաս»,- նշեց նա:
Մայրաքաղաքում ամսվա առաջին կեսին ջերմաստիճանը գիշերը կլինի 7-12 աստիճան, իսկ ամսվա երկրորդ կեսին ցերեկը կբարձրանա մինչեւ 32-34 աստիճան։ Արարատյան դաշտում ամսվա առաջին օրերին գիշերային ժամերին օդի ջերմաստիճանը կտատանվի 7-12–ի սահմանում, իսկ ամսվա երկրորդ կեսին, պայմանավորված տաք օդային հոսանքների ներթափանցմամբ, կհասնի մինչեւ 32-34 աստիճան։
Շիրակում, Կոտայքում, Գեղարքունիքում, Արագածոտնի եւ Վայոց Ձորի լեռնային շրջաններում ամսվա առաջին օրերում ջերմաստիճանը գիշերային ժամերին կարող է նվազել մինչեւ 2-5, իսկ ցերեկային ժամերին` 22-26 աստիճան:
Տավուշի մարզում ամսվա առաջին օրերին գիշերային ժամերին հնարավոր է ջերմաստիճանի անկում` մինչեւ 5-8, իսկ ցերեկվա ժամերին 27-31 աստիճան:
Լոռիում ամսվա առաջին օրերին գիշերային ժամերին ջերմաստիճանը կնվազի մինչեւ 3-6, ամսվա երկրորդ կեսին ցերեկային ժամերին կբարձրանա մինչեւ 25-27 աստիճան: Սյունիքի մարզում գիշերային ժամերին կդիտվի 7-11 աստիճան տաքություն, իսկ ամսվա երկրորդ կեսին ցերեկը սպասվում է մինչեւ 32-37 աստիճան տաքություն: