Ազատության հրապարակում այսօր՝ մայիսի 27-ին, ժամը 19:00-ին կայանալիք «Ընդդեմ հոսանքի ապօրինի թանկացման» հավաքն ամեն կերպ խոչընդոտում են: Այս մասին NEWS.am-ի հետ զրույցում ասաց «Ոչ թալանին» նախաձեռնության անդամ Վաղինակ Շուշանյանը:
«Այսօրվա հավաքի համար գնացինք, Օպերայից հոսանք խնդրեցինք, ոմն Սուրիկ ասաց, ես ձեր ենթակայանը չեմ, հոսանք չեմ կարա տամ: Բացի դա երեկ այնտեղ համերգ է եղել, ահռելի քանակությամբ աղբ կա թափած, կատաստրոֆիկ վիճակ, զանգեցինք «Սանիտեկ», մեզ ասեցին` չգիտենք՝ այսօր կարող ենք գալ, թե ոչ»,-ասաց նա:
Վաղինակ Շուշանյանը նշեց, որ իրենք դիմել են Երեւանի քաղաքապետարան, որտեղից պատասխանել են, որ իրենց լիազորությունների մեջ է մտնում միայն հավաք անցկացնել թույլ տալը, իսկ տեխնիկական մասը պետք է ապահովեն հավաքի կազմակերպիչները:
«Քաղաքապետարանում մեզ ասում են՝ մենք թույլ ենք տալիս, որ հավաք անեք, բայց տեխնիկապես ապահովել չենք կարող, կարող ա` պլակատներ էլ պետք գան, մենք հո էդ հարցն էլ չե՞նք լուծի: Մենք էլ եթե դվիժոկ բերենք, ոստիկանությունը թույլ չի տա դա Օպերա մտցնել»,- փոխանցեց Շուշանյանը:
«Ընդդեմ հոսանքի ապօրինի թանկացման» հավաքի նախաձեռնողները պնդում են, որ ամեն ինչ արվում է, որպեսզի այսօրվա բողոքի ակցիան տեղի չունենա:
Հիշեցնենք, որ ներկայումս սակագինը կազմում է 1 կՎտ-ի համար 41,85 դրամ ցերեկը, եւ 31,85 դրամ՝ գիշերը։ ՀԷՑ-ն առաջարկում է թանկացնել մինչեւ 58 եւ 48 դրամ համապատասխանաբար: