ԼՂՀ գերագույն դատարանի վճռաբեկ պալատն անփոփոխ է թողել ադրբեջանցի դիվերսանտներ, ԼՂՀ-ում ազատազրկված Շահբազ Գուլիեւի եւ Դիլհամ Ասկերովի դատավճիռը: Այս մասին NEWS.am-ին ասաց Ասկերովի փաստաբան Էրիկ Բեգլարյանը:
Նշենք, որ դիվերսանտների փաստաբանները բողոքարկել էին նախորդ երկու ատյանների կայացրած որոշումները, որոնց համաձայն՝ Ասկերովը դատապարտվել էր ցմահ, իսկ Գուլիեւն էլ 22 տարվա ազատազրկման:
Հիշեցնենք, որ Դիլհամ Ասկերովին մեղադրանք էր առաջադրվել Լեռնային Ղարաբաղի քրեական օրենսգրքի 7, իսկ նույն երկրի քաղաքացի Շահբազ Գուլիեւին ՝ 5 հոդվածների հատկանիշներով։ Նրանք մեղադրվում են ազգային ատելության շարժառիթներով մարդուն առեւանգելով սպանելու, կազմակերպված խմբի կողմից անչափահասի նկատմամբ զենքի գործադրմամբ բռնություն գործադրելու, լրտեսության, Ղարաբաղի պետական սահմանը կազմակերպված խմբի կողմից հատելու, հրազեն եւ ռազմամթերք կրելու մեջ։ Դիլհամ Ասկերովին նաեւ կազմակերպված խմբի կողմից ազգային ատելության շարժառիթով երկու անձանց սպանության փորձի մեղադրանք էր առաջադրվել։