Վրաստանի եվրաինտեգրումը չի կարող Հայաստանին ոչ շահեկան վիճակի մեջ դնել: Այս մասին մայիսի 27-ին խորհրդարանում հայտարարեց Հայաստանի ԱԳ փոխնախարար Կարեն Նազարյանը:
«Վրաստանի հետ մենք շարունակում ենք զարգացնել բարեկամական հարաբերությունները: Դրա համոզիչ ապացույցն են հաճախակի փոխայցելությունները, որոնց ընթացքում քննարկվում են ինչպես տարածաշրջանային, այնպես էլ երկկողմ հարցեր»,- հայտարարեց Նազարյանը:
Թափանցիկ եւ բարեկամական հարաբերությունների շնորհիվ, ըստ նրա, Հայաստանին ու Վրաստանին հաջողվում է լուծել գոյություն ունեցող բոլոր հարցերը:
Ինչ վերաբերում է ԵՄ-ի հետ Վրաստանի ապագա ծրագրերին, ապա դա Թբիլիսիի օրակարգում է: «Սակայն այդ ծրագրերից կարող են շահել տարածաշրջանի բոլոր երկրները: Այստեղ պոտենցիալ հարցեր չեմ տեսնում: Հույս ունեմ, որ Վրաստան-ԵՄ եւ Հայաստան-ԵՄ նախագծերը ներդաշնակ կլինեն»,- ընդգծեց փոխնախարարը: