Վանաձորի բնակիչներն այսօր` մայիսի 27–ին, միացան էլեկտրաէներգիայի թանկացման դեմ` տարբեր մարզերում անցկացվող բողոքի ակցիաներին։ Ակցիայի մի մասնակիցները նամակ հանձնեցին քաղաքապետին՝ իրենց պահանջները պատկան մարմիններին փոխանցելու համար:
«Էլեկտրաէներգիայի թանկացումը չունի հիմնավորում, պայմանավորված է երկրում տիրող ամենաթողությամբ, լայնածավալ կոռուպցիայով, որը տեղի է ունենում ՀՀ կառավարության գիտությամբ: Հատկապես մարզերի բնակչության համար, ովքեր ապրում են առավել ծանր սոցիալական պայմաններում, որտեղ գործազրկությունն ավելի մեծ ծավալների է հասնում, նման թանկացումը կունենա ծանր հետևանքներ և էլ ավելի մեծ թվով քաղաքացիների կստիպի լքել իրենց հայրենիքը ու բռնել արտագաղթի ճամփան: ՀՀ իշխանություններից պահանջում ենք դադարեցնել էլէկտրաէներգիայի սակագնի թանկացմանն ուղղված բոլոր միջոցառումները, հետաքննություն սկսել երկրում տիրող ֆինանսական վիճակի, հնարավոր կոռուպցիոն գործարքների և ֆինանսական մեքենայությունների վերաբերյալ»,– ասվում է ՀՀ հանրային ծառայությունները կարգավորող հանձնաժողովին, ՀՀ կառավարությանը և Վանաձորի քաղաքապետին հասցեագրված նամակում։
Նշենք, որ այսօր բողոքի ակցիաներ են տեղի ունեցել Հայաստանի տարբեր մարզերում։ Երեւանի Ազատության հրապարակից մեկնարկած երթը դեռ շարունակվում է։
Հիշեցնենք, որ ՀԷՑ-ը դիմել է Հանրային ծառայությունների կարգավորող հանձնաժողովին՝ հոսանքի սակագինը մոտ 16 դրամով բարձրացնելու համար։ Հոսանքի թանկացմանը կհաջորդի առաջին անհրաժեշտության ապրանքների թանկացումը, որը մեծ հարված կլինի ցանկացած ՀՀ քաղաքացու գրպանին։