Էլեկտրաէներգիայի թանկացման դեմ «Ոչ թալանին» նախաձեռնության կազմակերպած հավաք երթի մասնակիցները, այսօր` մայիսի 27-ին, Թումանյան-Աբովյան փողոցներով շարժվեցին դեպի կառավարության շենք և «ամոթ-ամոթ», «Մենք ենք տերը մեր երկրի» վանկարկելով` միջնամատը պարզած, կամ բութ մատը` ներքեւ, մի քանի րոպե կանգնեցին կառավարության շենքի դիմաց: Այնուհետև հավաք-երթի մասնակիցները` որպես բողոքի նշան, 5 րոպե նստեցին կառավարության շենքի դիմաց:
Բողոքի բազմամարդ երթը կավարտվի Ազատության հրապարակում, որտեղից սկսվել էր։
Նշենք, որ այսօր էլեկտրաէներգիայի թանկացման դեմ բողոքի ակցիաներ են անցկացվում նաեւ Հայաստանի մարզերում:
Հիշեցնենք, որ ՀԷՑ-ը դիմել է Հանրային ծառայությունների կարգավորող հանձնաժողովին՝ հոսանքի սակագինը բարձրացնելու համար։ Ներկայումս սակագինը կազմում է 1 կՎտ-ի համար 41,85 դրամ ցերեկը, եւ 31,85 դրամ՝ գիշերը։ ՀԷՑ-ն առաջարկում է թանկացնել մինչեւ 58 եւ 48 դրամ համապատասխանաբար: