Ուրախալի է, որ Հայաստանն եւ ԵՄ-ն ընդհանուր լեզու են գտել հետագա բանակցությունները շարունակելու հարցում։ Այս մասին NEWS.am-ի թղթակցին հայտարարեց Հայաստանում Շվեդիայի դեսպանատան գործերի ժամանակավոր հավատարմատար Մորթեն Էնբերգը՝ մեկնաբանելով մայիսի 21-22-ը Ռիգայում «Արեւելյան գործընկերության» գագաթնաժողովը։
«Ընդհանուր լեզու ենք գտել նաեւ վիզային ռեժիմի երկխոսության շուրջ, ինչի համար մենք նույնպես շատ ուրախ ենք։ Իսկ ընդհանուր առմամբ գագաթնաժողովը ցույց տվեց, որ մենք բաց ենք առաջ գնալու համար։ Կան մի շարք պահանջներ, որոնք Հայաստանը պետք է ընդունի՝ կապված կենսաչափական անձնագրերի, առեւտրում շուկաների հավասարության եւ այլ հարցերով։ Դրանք տեխնիկական հարցեր են, բայց մենք պետք է լուծենք դրանք։ Մենք Հայաստանի կողմից տեսնում ենք այդ ձգտումը։ Այն, որ գագաթնաժողովին պետությունը ներկայացնում էր հանրապետության նախագահը, շատ բանի մասին է խոսում»,- հայտարարեց Էնբերգը։
