Մենք չուզեցինք առաջադրվենք, դրա համար էլ չդրեցինք թեկնածություն: Այս մասին NEWS.am-ի թղթակցի հետ զրույցում ասաց ԱԺ ԲՀԿ-ական պատգամավոր Մելիք Մանուկյանը (Շշի Մելոն)՝ պատասխանելով մեր հարցին, թե ինչու իր եղբայրները չառաջադրվեցին Աբովյանի քաղաքապետի ընտրություններին :
«Չուզեցինք, չառաջադրվեցինք, թող իրենցը լինի»,-ասաց նա: Դիտարկմանը, թե Ծառուկյանն է խնդրել չառաջադրվել, նա նշեց, որ նման խնդիր չկա, իրենք են որոշել չդնել թեկնածություն: Իսկ թե ում օգտին է քվեարկելու պատգամավորը եւ նրա ընտանիքի անդամները, Մելիք Մանուկյանն ասաց, որ քվեարկությունը գաղտնի է, եթե այժմ հրապարակային ասի, օրենք կխախտի, երբ կմտնի քվեախցիկ, այդ ժամանակ էլ կորոշի՝ ում ընտրել: «Ես ձեռնպահ եմ, կնայեմ հայեցողությանս՝ կարող է գնամ քվեարկության, կարող է չգնամ, կերեւա, չեմ հետաքրքրվում այդ թեմայով»,-ասաց պատգամավորը:
Նշենք. որ Աբովյանի քաղաքապետի պաշտոնին պայքարելու համար առաջադրվել է 6 թեկնածու: Ինքնառաջադրվել է որպես Ծառուկյանի օգնական եւ նրա հովանավորյալ հայտնի Վահագն Գեւորգյանը, ում սատարում է նաեւ ՀՀԿ-ն ու ԲՀԿ-ն: Ինքնառաջադրված Էդվին Թադեւոսյանը Ծառուկյանի մորաքրոջ որդին է, Սամվել Հակոբյանը՝ Ծառուկյանի ազգականը վերջինիս կնոջ կողմից: Վահագն Գեւորգյանի հիմնական մրցակիցը «Քինգ դելյուքսի» սեփականատերը Արթուր Գեղամի Հարությունյանն է՝ Պալաչը: Նույն անուն-ազգանուն-հայրանունով՝ Արթուր Գեղամի Հարությունյան, ինքնառաջադրվել է նաեւ մեկ այլ թեկնածու: Ըստ Պալաչի՝ վերջինիս առաջադրել է Ծառուկյանը, որպեսզի մարդկանց շփոթության մեջ մտցնի եւ իր փոխարեն՝ շփոթվեն ու նրա օգտին քվեարկեն: Ընտրություններին մասնակցելու համար ինքնառաջադրվել է նաեւ անկուսակցական, Աբովյանի նախկին քաղաքապետ Կարապետ Իսրայելյանը: Ընտրությունները կկայանան հունիսի 7-ին: