Հայոց ցեղասպանության ճանաչման համար ամբողջ աշխարհի հայությունը պետք է համախմբված քայլեր ձեռնարկի, որ Թուրքիան վերադարձնի «պարտքը»: NEWS.am-ի հետ զրույցում նման կարծիք հայտնեց «Հայաստան» համահայկական հիմնադրամի Մեծ Բրիտանիայի մասնաճյուղի ատենապետ Արմինե Կարապետին:
Նրա խոսքով՝ Թուրքիան հայերին պարտք է 800 մլրդ ԱՄՆ դոլարից ավելի գումար:
«Ամբողջը, իհարկե, վերադարձնել չի կարող, բայց մենք պետք է պահանջատեր լինենք: Ցեղասպանության ճանաչման համար անվերջ պետք է խոսել, ոչ թե մեկ անգամ խոսել, ապա քնեցնել հարցը, օգուտ չի ունենալու: Անընդհատ պետք է աշխատանքներ կատարվեն, բավականին դժվար է, բավականին մեծածախս է լինելու, հուսամ՝ կլինեն մարդիկ, որոնք ծախսերը կհոգան»,- ասաց Արմինե Կարապետին:
Ինչ վերաբերվում է Մեծ Բրիտանիայի կողմից Ցեղասպանությունը չճանաչելուն, բարերարը նշեց, որ իրենք բազմիցս նամակներով դիմել են երկրի իշխանություններին, պախարակել նրանց կատարած քայլերը: