Սյունիքի մարզպետ Սուրիկ Խաչատրյանի դեմ մահափորձն անթույլատրելի եւ դատապարտելի արարք է: Այս մասին այսօր՝ մայիսի 28-ին, լրագրողների հետ զրույցում ասաց Արագածոտնի մարզպետ Սարգիս Սահակյանը:
«Դա անթույլատրելի, դատապարտելի գործունեություն է, այդպիսի բան չի կարելի։ Մարդկային լեզվով մարդիկ պետք է իրար հետ խոսեն, փորձեն իրենց հարաբերությունները պարզել»,-ասաց մարզպետը։
Մարզպետը չկարողացավ ասել, թե ովքեր կարող են կանգնած լինել Սուրիկ Խաչատրյանի դեմ մահափորձի հետեւում՝ ավելացնելով. «Իրավաբանները քննում են գործը, կուսումնասիրեն և կհայտնեն իրենց կարծիքը»:
Լրագրողների դիտարկմանը, թե Սյունիքում վախենում են մարզպետից, Սարգիս Սահակյանը վստահեցրեց, որ նման բան չկա, ինքն անձամբ հաճախ է լինում Սյունիքում եւ ծանոթ է մթնոլորտին:
Ավելի վաղ NEWS.am-ը հայտնել էր, որ Կապան-Գորիս ճանապարհին 2015թ. մայիսի 20-ին կրակել են Սյունիքի մարզպետ Սուրիկ Խաչատրյանի մեքենայի ուղղությամբ։ NEWS.am-ի տեղեկությունը հաստատել էր Սյունիքի մարզպետի խորհրդական Զարզանդ Նիկողոսյանը՝ հավելելով, որ տուժողներ չկան: Ժամեր անց Քննչական կոմիտեն մամուլի հաղորդագրություն էր տարածել՝ նշելով, որ ՀԿԳ քննչական գլխավոր վարչության վարույթում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 2-րդ մասի եւ 235-րդ հոդվածի 1-ին մասի հատկանիշներով: