Ե՛վ Ռուսաստանը, ե՛ւ Եվրամիությունը պետք է հասկանան, որ իրենց հարեւանությունն ընդհանուր է, եւ այդ հարեւանության երկրներն իրենց զարգացման ուղու վերաբերյալ ինքնուրույն որոշում կայացնելու կարիք ունեն: Այս մասին NEWS.am-ի թղթակցի հետ զրույցում հայտարարեց իսպանացի փորձագետ, «FRIDE» եվրոպական վերլուծական կենտրոնի Արեւելյան Եվրոպայի, Կովկասի եւ Կենտրոնական Ասիայի ծրագրերի ղեկավար Յոս Բունստրան:
Նրա խոսքով, Ռուսաստանի եւ ԵՄ-ի միջեւ շահերի բախում կա: «ԵՄ-ն ձգտում է կայուն երկարաժամկետ գործընկերություն զարգացնել՝ հիմնված ժողովրդավարության եւ տնտեսական զարգացման վրա: Ռուսական ներկա ղեկավարության ժամանակաշրջանում Մոսկվան ձգտում է ոչ թե իր հարեւանների հետ ինտեգրման, այլ փորձում է գերիշխող դիրք զբաղեցնել իր պոտենցիալ գործընկերների նկատմամբ»,- նշեց Բունստրան:
Ըստ փորձագետի, մինչ ԵՄ-ն ձգտում էր գործիքներ օգտագործել, որպեսզի երկրներին օգնի զարգանալ, Ռուսաստանն օգտագործում էր առեւտրային էմբարգոն, անվտանգության գործոնը եւ այլ միջոցներ՝ նպատակ ունենալով երկրներին կապել իր ազդեցության ոլորտին: «ԵՄ-ն չպետք է Ռուսաստանի ագրեսիայի պատճառով սահմանափակի հարաբերություններն իր գործընկերների հետ»,- հավելեց Յոս Բունստրան: