Ղազախստանում մեկնարկել է ԱՊՀ կառավարությունների ղեկավարների խորհրդի նիստը, որտեղ մասնավորապես քննարկվելու է ֆինանսատնտեսական ոլորտի հարցերի լուծման համատեղ պլանը։
Օրակարգում է նաեւ ԱՊՀ անդամ պետությունների տարածքում միջազգային փոխադրումների ժամանակ տրանսպորտային անվտանգության ապահովման հարցը։
Բացի այդ, պլանավորվում է քննարկել 2015/2016թթ. նորարարական համագործակցության միջպետական ծրագրի միջոցառումները, մինչեւ 2025թ. ընկած ժամանակահատվածում անտառային տնտեսության եւ անտառային արդյունաբերության ոլորտի հարցերը, գրում է «ՌԻԱ Նովոստի»-ն։
Պլանավորվում է քննարկել նաեւ մինչեւ 2020թ. ԱՊՀ անդամ երկրների միջտարածաշրջանային եւ սահմանային համագործակցության հարցը։ Կքննարկվի մտավոր սեփականության ոլորտում մասնագետների պատրաստման եւ պրոֆեսիոնալ վերապատրաստման միջպետական համակարգի ձեւավորման եւ զարգացման հարցը։
Ընդհանուր առմամբ վարչապետները քննարկելու են 20 փաստաթուղթ։