Վարչապետ Հովիկ Աբրահամյանի գլխավորած կառավարական պատվիրակությունը մայիսի 28-ին աշխատանքային այցով ժամանել է Ղազախստանի Հանրապետություն՝ մասնակցելու ԱՊՀ պետությունների կառավարությունների ղեկավարների խորհրդի եւ Եվրասիական միջկառավարական խորհրդի նիստերին:
Կառավարության մամուլի ծառայությունից հայտնում են, որ նույն օրը երեկոյան Բուրաբայում Հայաստանի վարչապետ Հովիկ Աբրահամյանն առանձնազրույց է ունեցել Բելառուսի վարչապետ Անդրեյ Կոբյակովի հետ:
Երկու երկրների վարչապետները քննարկել են հայ-բելառուսական տնտեսական համագործակցության խորացմանը վերաբերող մի շարք հարցեր: Երկուստեք կարեւորվել է տարբեր ուղղություններով համագործակցության զարգացումը եւ խորացումը: Զրուցակիցները գոհունակությամբ փաստել են, որ երկկողմ գործակցությունը վերջին տարիներին զգալիորեն ակտիվացել է: Հայաստանի եւ Բելառուսի վարչապետները բարձր են գնահատել հարաբերությունների ներկայիս մակարդակը եւ կարեւորել տնտեսական կապերի հետագա զարգացման, առեւտրաշրջանառության ծավալների ավելացման անհրաժեշտությունը:
Առանձնազրույցի ընթացքում վարչապետներ Աբրահամյանը եւ Կոբյակովն անդրադարձել են ինչպես երկկողմ, այնպես էլ ԱՊՀ եւ ԵՏՄ շրջանակում համագործակցության զարգացմանը վերաբերող բազմաթիվ հարցերի:
