Նախկին ԱԺ պատգամավոր Հակոբ Հակոբյանին պատկանող Արմավիրի մարզի Զվարթնոց գյուղի գազալցակայանում, մայիսի 25-ին հրդեհ է բռնկվել հրդեհատեխնիկական կամ էլեկտրահամակարգի խախտման պատճառով: Այս մասին այսօր` մայիսի 29-ին, լրագրողների հետ հանդիպմանն ասաց ՏԿԱԻՆ գազասարքավորումների և վառելիքի օբյեկտների տեխանվտանգության փորձաքննության բաժնի պետ Ռուբեն Բադեյանը` հավելելով, որ դա իրենց պրակտիկայում հազվադեպ պատահող դեպքերից է:
«Հակոբ Հակոբյանի գազալցակայանում հրդեհն սկսվել է խողովակի բռնկումից, այնուհետև տարածվել ու պայթեցրել Volkswagen մակնիշի 34 QF 306 համարանիշի ավտոմեքենան: Եթե կա հրդեհ, նշանակում է, որ գազալցակայանում եղել է հրդեհատեխնիկական կամ էլեկտրահամակարգի խախտում»,– ասաց նա։
Ռուբեն Բադեյանը նշեց, որ Հակոբ Հակոբյանին պատկանող գազալցակայանում վերջին անգամ ստուգումներն անցկացվել են 2010թ., մինչդեռ գազալցակայանները տարին մեկ անգամ պետք է անցնեն տեխզննում։
Ավելի վաղ NEWS.am-ը հայտնել էր, որ Արմավիրի մարզի Զվարթնոց գյուղի գազալցակայաններից մեկում մայիսի 25-ի առավոտյան, պայթյուն է տեղի ունեցել, ինչի հետեւանքով 3 մարդ վիրավորվել է: Պայթել է Volkswagen մակնիշի 34 QF 306 համարանիշի ավտոմեքենան, որը պատկանում է նախկին ԱԺ պատգամավոր Հակոբ Հակոբյանի (Ճոյտ) հարազատներին կիսով չափ այրվել է: Պայթյունի հետեւանքով վիրավորվել են մեքենայի կողքին գտնվող Հակոբ Հակոբյանի եղբայրը եւ որդին, ինչպես նաեւ գազալցակայանի աշխատողը: