Արարատի մարզի Նորամարգ գյուղում այսօր՝ մայիս 29-ին սրընթաց զարգացող քաղցկեղից մահացել է նորակոչիկ, ազգությամբ եզդի 19-ամյա Խդր Սարոյանը: Այս մասին NEWS.am-ի հետ զրույցում ասաց Նորամարգի գյուղապետ Սարգիս Գալստյանը՝ նշելով, որ Խդրը ԵՊՀ աստվածաբանության առաջին կուրսի ուսանող էր:
«Խդրը այս տարվա հունվարի 12-ին էր զորակոչվել բանակ եւ երդման արարողությունից հետո վատացել է, բարձր ջերմություն է ունեցել, հոսպիտալներում է անցկացրել երկար ժամանկ եւ այսօր մահացել է»,-ասաց նա՝ նշելով, որ մինչեւ զորակոչվելը ոչ ոք չի իմացել նրա հիվանդության մասին:
Գյուղապետը նշեց, որ Խդրի ծնողները անասնապահությամբ ապրող ազգությամբ եզդի ընտանիք են: Խդրը ընտանիքում միակ արու զավակն էր, ունի իրենից փոքր մեկ քույր: