Հայաստանի գազալցակայաններում տեղի ունեցող պայթյունների հիմնական մեղավորները վարորդներն են, որոնք գազի բալոնները ճիշտ չեն շահագործում` չանցկացնելով փորձաքննություն: Այս մասին, այսօր` մայիսի 29-ին, լրագրողների հետ զրույցում ասաց ՏԿԱԻՆ գազասարքավորումների եւ վառելիքի օբյեկտների տեխանվտանգության փորձաքննության բաժնի պետ Ռուբեն Բադեյանը` հավելելով, որ հայերը գազի բալոնները փորձաքննության տանելուց խուսափում են` 5000 դրամ ավելի փող չծախսելու համար եւ արդյունքում լինում են զոհեր, այրվում մեքենաներ ու գազալցակայաններ:
«Դժբախտ պատահարների մեղավորները նաեւ գազալցակայանի աշխատակիցներն են, որոնք վարորդներից չեն պահանջում փաստաթուղթ, որտեղ գրված է գազաբալոնի փորձաքննության արդյունքները: Գործարանում արտադրելիս գազի բալոնների վրա փակցնում են 200 մթնոլորտ աշխատանքային ճնշման տակ աշխատելու վերաբերյալ ինֆորմացիա: Նշված ճնշումը պետք չէ գերազանցել, որն էլ գազալցակայանների աշխատակիցները հաճախ են գերազանցում»,-ասաց Ռուբեն Բադեյանը:
Էկոնոմիկայի նախարարության աշխատակազմի` շուկայի վերահսկողության պետական տեսչության փաստաթղթաշրջանառության եւ իրավական համակարգման բաժնի պետ Արծրուն Նաջարյանն էլ տեղեկացրեց, որ չնայած` Էկոնոմիկայի նախարարությունը հանրապետության գազալցակայաններում անվտանգության ապահովման համար տեղադրել է գազի ջերմաստիճանն ապահովող գազաբաշխիչ աշտարակներ, սակայն անփույթ վարորդների ու գազալցակայնների անպատասխանատու տնօրենների ու աշխատակիցների պատճառով էլի հնարավոր չի լինում խուսափել դժբախտ պատահարներից. « Շատ վարորդներ անգամ տան պայմաններում են տեղադրում գազի բալոնը, որի արդյունքում էլ տեղի են ունենում պայթյուններ»:
«Իրազեկ եւ պաշտպանված սպառողներ» ՀԿ հանրային կապերի պատասխանատու Սիրանույշ Զաքարյանի կարծիքով էլ դժբախտ պատահարներից խուսափելու համար կառավարությունը պետք է գազալցակայաններում եւ ավտոտեխզննման կետերում ուժեղացնի վերահսկողությունը: Նա վարորդներին խորհուրդ տվեց խուսափել ժամկետանց եւ անորակ, փորձաքննություն չանցած գազի բալոնների շահագործումից: