Génocide arménien: les élus turcs continuent d'éluder la question
Բելգիական RTL-TVI հեռուստաընկերությունը որոշել է պարզել Հայոց ցեղասպանության վերաբերյալ ցենտրիստական կուսակցության ծագումով թուրք մի քանի պատգամավորների դիրքորոշումը այն բանից հետո, երբ բրյուսելցի պատգամավոր Ահմեդ Էլ Հանուսի սկանդալային հայտարարությունից հետո բելգիական «Հումանիստական ժողովրդավարական կուսակցության» նախագահ Բենուա Լյութժենը հայտարարել էր, որ բոլոր ժխտողներին վռնդելու են կուսակցությունից։
Ինչպես գրում է La Libre-ն, հեռուստաընկերության լրագրողները այցելել են Բրյուսելի խորհրդարան, որպեսզի հարցեր տան պատգամավոր Մահինուր Օզդեմիրին։ Հեռուստաընկերությունը կապ է հաստատել հասարակության հետ կապերի բաժնի պատասխանատուի հետ, որը, ըստ երեւույթին, այդ մասին SMS-ով տեղյակ է պահել պատգամավորին։ Վերջինս, մի քանի անգամ նայելով տեսախցիկին, արագ փախել է դահլիճից։ Հեռուստատեսության լրագրողներին հղած հաղորդագրության մեջ այդ քայլը բացատրել են այն հանգամանքով, որ Մահինուր Օզդեմիրի բժիշկը նրան խորհուրդ է տվել շատ հանգստանալ։
Այդուհանդերձ նույն օրը երեկոյան պատգամավորը ներկա է եղել համայնքային խորհրդի նիստին։ RTL հեռուստատեսությունը փորձել է նորից նրան հարցեր տալ, սակայն ապարդյուն։ Տեսնելով տեսախցիկները՝ Մահինուր Օզդեմիրը արագ անհետացել է։
