News
Լրահոս
News
Երեքշաբթի
Մարտ 19
Տեսնել լրահոսը

Մայիսի 29-ին ՀՀ ՊՆ վարչական համալիրում կայացել է հերթական աշխատանքային խորհրդակցությունը: Կենտրոնական ապարատի ղեկավար կազմի մասնակցությամբ անցկացված խորհրդակցությունը նվիրված էր 2015 թ. մայիս ամսվա ընթացքում զինված ուժերում կատարված աշխատանքների, առաջիկա անելիքների եւ միջոցառումների քննարկմանը:

Ողջունելով խորհրդակցության մասնակիցներին՝ նախարար Սեյրան Օհանյանը ներկաների ուշադրությունը հրավիրեց հաշվետու ժամանակահատվածում առաջնագծում եւ մշտական տեղակայման վայրերում անձնակազմի զգոնության ու կարգապահության, մարտական եւ զորահավաքային պատրաստականության միջոցառումների, ինչպես նաեւ 2015թ. ամառային զորակոչի շրջանակում ընթացող նախապատրաստական աշխատանքների վրա:

Վերլուծությունների եւ հարցադրումների միջոցով պաշտպանական գերատեսչության ղեկավարին ներկայացվեցին մայիս ամսվա ընթացքում զինված ուժերում անցկացված մարտական պատրաստության միջոցառումների, հրամանատարաշտաբային զորավարաժությունների, մարտական կիրառման պլանների ճշտումների, հանկարծակի ստուգումների արդյունքները:

 Հատուկ անդրադարձ կատարվեց հատկապես զինված ուժերի տարբեր ստորաբաժանումներում անցկացված հանկարծակի ստուգումներին, որոնց արդյունքների եւ ընդհանուր գնահատականի վերաբերյալ հաշվետու զեկույց ներկայացրեց ՀՀ ԶՈՒ գլխավոր շտաբի պետ, գեներալ-գնդապետ Յուրի Խաչատուրովը: Նա փաստեց, որ ընդհանուր առմամբ ստուգված զորամասերը մարտական պատրաստականության բարձր աստիճանի բերվելու եւ առաջադրված խնդիրները կատարելու ունակ են:

Խորհրդակցությունը եւս մեկ անգամ փաստեց, որ անցած մեկ ամսվա ընթացքում, իբրեւ նախորդ ամիսների շարունակություն, պատշաճ կերպով իրականացվել են զինված ուժերի ուսումնական պլանով նախատեսված միջոցառումները, որոնցից հատկապես ուշագրավ են տեխնիկական, թիկունքային եւ բժշկական ապահովման զորամասերի անձնակազմի ներգրավմամբ անցկացված մարտավարամասնագիտական զորավարժությունը եւ Տաջիկստանի Հանրապետության տարածքում Հավաքական անվտանգության պայմանագրի կազմակերպության արագ արձագանքման հավաքական ուժերի անակնկալ ստուգման գործողությունները, որոնց ընթացքում ազգային ստորաբաժանումները համատեղ ու ներդաշնակ գործողություններով կատարել են առաջադրված խնդիրները:

Ընդգծելով, որ հաշվետու ժամանակահատվում սահմանային լարվածությունն ընդհանուր առմամբ թուլացել է՝ պաշտպանության նախարարը ներկաներին հորդորեց չտրվել հարաբերական անդորրի խաբուսիկ գայթակղությանը եւ լուրջ ուշադրություն դարձնել առաջնագծում ու մշտական տեղակայման վայրերում անձնակազմի զգոնության, մարտական հերթապահության կրման պայմանների, ամրաշինական կառույցների կատարելագործման միջոցառումներին: Նախարարը կոչ արեց առավել կենտրոնացնել ջանքերը՝ հակառակորդի սադրանքներից ու ոտնձգություններից զերծ մնալու համար:

Խորհրդակցության մասնակիցների ուշադրության կենտրոնում էին նաեւ առաջիկայում անցկացվելիք զորավարժությունների, ռազմամարզական հավաքների կազմակերպչական խնդիրները, ռազմարդյունաբերության ոլորտի զարգացման հարցերը, պաշտպանության ռազմավարական վերանայման գործընթացի, 2016-2020թթ. Զարգացման պլանի շրջանակում կատարվող աշխատանքները, որոնց վերաբերյալ հակիրճ զեկույցներ ներկայացրին պատասխանատու ստորաբաժանումների ղեկավարները:

Պաշտպանական գերատեսչության ղեկավարի կողմից հատուկ ցուցում տրվեց նաեւ ռազմական ոստիկանության աշխատակիցներին՝ զինծառայողների մասնակցությամբ ճանապարհատրանսպորտային պատահարների պատճառները մանրակրկիտ ուսումնասիրելու, համապատասխան կանխարգելիչ աշխատանքներ տանելու, ինչպես նաեւ զինծառայողների կողմից համազգեստի կրման կանոնները խստորեն պահպանելու ու վերահսկելու ուղղությամբ:

!
Այս նյութը հասանելի է նաև   Русский
Տպել
Ամենաշատ