Բրազիլիայի Սան Պաուլո քաղաքի համայնքային խորհուրդը Հայոց ցեղասպանությանը նվիրված հատուկ նիստ է հրավիրել։ Միջոցառումը նախաձեռնել են խորհրդի անդամ Ժիլբերտու Նատալիինին եւ Հարավային Ամերիկայի Հայ Դատի հանձնախումբը։ Այս մասին տեղեկացնում է Prensa Armenia գործակալությունը։

«Բրազիլիան աշխարհի ժողովուրդների հետ համակեցության հնագույն ավանդույթներ ունի։ Նա հակամարտությունները լուծելու հարցում որդեգրել է երկխոսության եւ միջնորդության դիրքորոշումը։ Այն, ինչ մենք անում ենք այստեղ, անում ենք նրա համար, որպեսզի հարգանքի տուրք տանք հայ ժողովրդին։ Որպեսզի հիշենք ոչ միայն այդ տխուր պահը, այլ նաեւ օրինակ ծառայենք ներկայի եւ ապագայի համար, որպեսզի մարդիկ ապրեն ներդաշնակ եւ խաղաղ»,- ասել է խորհրդի անդամը։

Բացի այդ, Նատալինին խնդրագիր է ներկայացրել Գերագույն դատարան, պատգամավորների դաշնային պալատ եւ Բրազիլիայի նախագահ Դիլմա Ռուսեֆին՝ խնդրելով Բրազիլիայի բոլոր մարմիններին միանալ Հայոց ցեղասպանության ճանաչմանը, ինչպես դա արել են մի շարք պետություններ։

Միջոցառման ավարտին մաեստրո Ալեքսեյ Քուրքջյանին Սան Պաուլոյի եւ Հարավային Ամերիկայի Հայ Դատի հանձնախմբի կողմից շնորհվել է դոկտորի կոչում հայ երաժշտությունը պահպանելու եւ  նրան հավատարիմ մնալու  համար։