Գեղարքունիքի մարզում մայիսի 28-ին՝ ժամը 15.30-ի սահմաններում գրանցված սաստիկ քամու հետեւանքով պոկվել է Սևանի Նորիկ Ղազարյանի անվան մարզադպրոցի դահլիճի տանիքը՝ շուրջ 210ք/մ տարածքով: Այս մասին NEWS.am-ին հայտնեց մարզադպրոցի տնօրեն տնօրեն Վալերիկ Նիկողոսյանը:
«Ուժեղ դրմփոց լսեցինք, մեզ թվաց, թե շենքը փլվեց, մարդիկ խուճապահար փախչում էին, բախտներս բերել ա, որ էդ պահին դպրոցի տարածքով մարդ չի անցել, թե չէ շիֆերները գլխներին կընկնեին: Հետո ուժեղ փոշի բարձրացավ, մի խոսքով, պատմելու բան չի, քամին էնքան ուժեղ ա եղել, որ ոչ միայն շիֆերներն ա տարել, այլ դրանք պահող փայտե կոնստրուկցիաները»,-ասաց Վալերիկ Նիկողոսյանը:
Տնօրենի խոսքով՝ 7-8 տարի առաջ վերանորոգված մարզադպրոցում, այժն հնարավոր չէ մարզումներ անցկացնել:
«Հիմա մարզադպրոցի դահլիճում պարապունքներ չենք կարող անել, եթե անձրև գա, ամբողջը ներս կլցվի, ստիպված ցելոֆանով ծածկել ենք, մինչև տեսնենք` ինչ կլինի, սենց բան չէր եղել երբեք»,-նշեց Նիկողոսյանը՝ ավելացնելով, որ նախքան քամին մարզադպրոցը բարվոք վիճակում է եղել:
Հավելենք, որ դեպքից անմիջապես հետո դեպքի վայր են մեկնել Սևանի քաղաքապետարանի համապատասխան բաժնի աշխատակիցները, ՏԿԱԻՆ բաժնից, իսկ թե վնասի չափն ինչքան է, այս պահին դեռ ճշտվում է:
Նույն օրը եւ ժամին ուժգին քամի է գրանցվել նաեւ Կոտայքի մարզում հատկապես Հրազդանում՝ վնասելով արդեն ծաղկած ծառերի բողբոջները:
NEWS.am-ի հետ զրույցում հրազդանցիները պատմեցին, որ խուճապահար են եղել. րոպեների ընթացքում ուժեղ փոշի է բարձրացրել:
«Համոզված եմ՝ վաղը ավերածությունների մասին էլ կլսենք, սենց քամի վաղուց չէինք տեսել, վախից չգիտեինք `քայլենք, հասնենք տուն, թե կանգնենք, որ ժեշտեր գխներիս չընկնեն, էրեխեքը վախից լացում էին»,-պատմում էին սարսափած անցորդները: