Չեխիայում թոշակառուն մեկնարկային ատրճանակից երեք անգամ կրակել է արդարադատության նախարար Ռոբերտ Պելիկանի ուղղութամբ: Այս մասին հաղորդում է E15.cz կայքը:
«Հարձակումը» տեղի է ունեցել Պրահայի մենաստաններից մեկում, որտեղ Պելիկանը մասնակցում էր ցուցահանդեսի բացմանը: Տարեց տղամարդը 15 մետր հեռավորությունից 3 անգամ կրակել է նախարարի ուղղությամբ, ինչից հետո ձերբակալվել է անվտանգության պահպանության աշխատակիցների կողմից:
«Քրեական գործ չեմ նախաձեռնելու: Ի վերջո, նա ընդամենը մեկնարկային ատրճնակից կրակեց: Ցավում եմ նրա համար»,- կատարվածն այսպես է մեկնաբանել Պելիկանը:
Ըստ Gazeta-ի, ենթադրվում է, որ այդպիսով տարեց տղամարդը ցանկացել է նախարարի ուշադրությունը հրավիրել իր խնդրի վրա: Թոշակառուի խոսքով, ավելի վաղ ինքը նամակ է ուղարկել Պելիկանին՝ բողոքելով անարդարության դեմ: «Հարձակվողը» հայտարարել է, որ անարդարացիորեն իրեն դատապարտել են՝ ծերանոցում ավտոմատ սարքից կոնֆետ գողանալու համար: