Վանաձորում դանակահարության պատճառով մահացած 15-ամյա հանդբոլիստի գործով 3 տարով ազատազրկված՝ Լոռու գլխավոր վիրաբույժ Վլադիմիր Ղուկասյանի փաստաբան Ռուբեն Հակոբյանը դիմել է Մարդու իրավունքների եվրոպական դատարան: Այս մասին NEWS.am-ին ասաց փաստաբանը:
Նա հայտնեց, որ բողոքարկել են վիրաբույժի խափանման միջոց կալանավորումը:
«Նախնական կալանքի հարցով ենք դիմել Եվրոպական դատարան: Հույս ունենք, որ ՄԻԵԴ-ն արդարացի որոշում կկայացնի»,- ասաց փաստաբանը:
Նշենք, որ Վլադիմիր Ղուկասյանի փաստաբանը վերաքննիչ բողոք չի ներկայացնելու առաջին ատյանի որոշման վերաբերյալ, որի համաձայն՝ բժիշկը դատապարտվել է 3 տարվա ազատազրկման:
Ավելի վաղ հայտնել էինք, որ 2013թ. հոկտեմբերի 12-ին «Վանաձոր» բժշկական կենտրոն էր տեղափոխվել Երեւանի բնակիչ, 15-ամյա Դավիթ Հովակիմյանը՝ «կրծքավանդակի ծակած վերք» ախտորոշմամբ: Նույն օրը ժամը 22.00-ի սահմաններում Դ. Հովակիմյանը հիվանդանոցում մահացել էր: Հոկտեմբերի 13-ին սպանությունը կատարելու կասկածանքով բերման էր ենթարկվել 1991թ. ծնված, նախկինում դատապարտված Կարեն Կ.-ն՝ «Քուրդ» մականունով: Պարզվել էր, որ նա հոկտեմբերի 12-ին ժամը 19.20-ի սահմաններում Վանաձորի Կ. Դեմիրճյան փողոցի հարեւանությամբ գտնվող այգում, վիճաբանության ժամանակ, դանակով հարվածել է Դ. Հովակիմյանին, որից հետո վերջինս հիվանդանոցում մահացել է: Գործն արդեն դատարանում է: Ավելի ուշ արդեն մեղադրանք էր առաջադրվել Լոռու գլխավոր վիրաբույժ Վլադիմիր Ղուկասյանին այն բանի համար, որ նա իր մասնագիտական պարտականությունները կատարել էր ոչ պատշաճ եւ անզգուշությամբ առաջացրել բուժվող հիվանդ Դավիթ Հովակիմյանի մահը:
Նշենք, որ Դավիթը Վանաձոր էր մեկնել՝ հանդբոլի Հայաստանի առաջնության եզրափակիչ մրցաշարին մասնակցելու համար: