Հայտնի են դարձել Ադրբեջանում 5-ամյա աղջնակի դաժան սպանության մանրամասները։ Հիշեցնենք, որ երեխային բռնաբարել էին, իսկ այնուհետեւ սպանել։ Ինչպես գրում է haqqin.az-ը, սպանված երեխայի հարեւանները պատմել են, որ նրա մայրը դեպքից մի քանի օր առաջ եռացրած ջրից ստացած այրվածքներով հիվանդ պառկած է եղել անկողնում, իսկ աղջկան խնամել է հայրը։ Միջադեպի օրը հայրը 15 րոպեով մենակ էր թողել բակում իր խաղալիքներով խաղացող աղջկան, իսկ այդ ժամանակ 32-ամյա հարեւանը՝ Յակով Չերնովը, որին բոլորը հանգիստ ու խաղաղ մարդ էին համարում, կանչել է աղջկան իր մոտ, բռնաբարել եւ ձեռքերով խեղդել։ Քանի որ ցերեկը դժվար է եղել դիակը թաքցնել, տղամարդը աղջկա մարմինը փաթաթել է գորգի մեջ եւ, ծածկելով այլ իրերով, դրել է աղբանոցում։
Երբ երեխայի կորուստը հայտնաբերած հայրը սկսել է որոնել աղջկան, նրան են միացել նաեւ մյուս հարեւանները, այդ թվում՝ հանցագործը։
Գիշերը արթուն մնացած ծնողները հարեւան բակից բահի զնգոցի ձայն են լսել եւ դուրս գալով բակ՝ տեսել են, որ Չերնովը ինչ-որ բան է փորում։ Ծնողները ոստիկանություն են զանգահարել։ Դեպքի վայր ժամանելով՝ ոստիկանները հայտնաբերել են երեխայի դիակը։
Այս պահին Չերնովի տունը շրջապատված է ոստիկաններով, որպեսզի տեղաբնակները նրան ինքնադատաստանի չենթարկեն։
