Հայաստանում էլեկտրաէներգիայի թանկացումը կարող է աղետ լինել: Այս մասին, այսօր՝ մայիսի 30-ին, լրագրողների հետ հանդիպման ժամանակ հայտարարել է ԲՀԿ անդամ, նախկին պատգամավոր, տնտեսագետ Վարդան Բոստանջյանը: Նրա խոսքով, որպես բողոքի նշան մարդկանց փողոց դուրս գալը ակնհայտորեն վկայում է այն մասին, որ նման բեռի տակ մարդիկ չեն կարող գոյատեւել:
«Առանց այդ էլ մարդիկ, այսպես ասենք, ամենալավ սոցիալական պայմաններում չեն, ու այստեղ նոր բեռ է ավելացվում: Չեմ ուզում խտացնել գույները, բայց դա կարող է վերջը լինել»,-հայտարարել է Բոստանջյանն ու հավելել. «Հայաստանի էլեկտրական ցանցեր» ընկերությունը պետք է պարզապես կրճատի իր չափից դուրս ծախսերը»:
Հիշեցնենք, որ ներկայումս բնակչության համար էլեկտրաէներգիայի սակագինը ցերեկային ժամերի համար կազմում է 41,85 դրամ, գիշերային ժամերի համար՝ 31,85 դրամ: ՀԷՑ-ն իր հայտում առաջարկում է այդ սակագները բարձրացնել հասցնելով համապատասխանաբար 58 եւ 48 դրամի: