Ավելի քան 1.5 տարի կառուցվող՝ Տավուշի մարզի Պառավաքար-Վազաշեն տարանցիկ ավտոճանապարհը 20 օրից պատրաստ կլինի: Այս մասին այսօր՝ մայիսի 31-ին, NEWS.am-ի հարցին ի պատասխան ասաց տրանսպորտի եւ կապի նախարար Գագիկ Բեգլարյանը:
«Հիմա շինարարական աշխատանքներ են կատարվում: Շուտով կավարտվի եւ քսան օրից բացումը կանենք»,- ասաց նախարարը:
Նշենք, որ շինարարությունն ի սկզբանե իրականացնում էր «Իջեւան Ճանշին» ընկերությունը, որը խոստացել էր մինչեւ հունիսի 30-ն աշխատանքներն ավարտվել: Հուլիսին վարչապետ Հովիկ Աբրահամյանը, տեղում ծանոթանալով աշխատանքներին, համոզվել էր, որ դրանք անավարտ են եւ հանձնարարել ընկերությանն ամենաուշը օգոստոսի 30-ին ավարտել այն: Ընկերությունը նորից պայմանը չկատարեց եւ արդեն սեպտեմբերին պետությունը պայմանագիրը խզեց «Իջեւան-Ճանշին»-ի հետ եւ նոր պայմանագիր կնքեց «Խաչհար»-ի հետ, որը պետք է շինարարությունն ավարտեր դեռ հոկտեմբերի 30-ին:
Հիշեցնենք, որ ճանապարհի ամբողջ երկարությունը 3 կիլոմետր 180 մետր է։ Երկու ամենավտանգավոր հատվածներում կառուցվում է նաեւ հենապատ՝ կրակոցներից պաշտպանվելու համար։ Մի հատվածում այն ունի 75 մետր երկարություն, 3 մետր բարձրություն, իսկ առավել վտանգավոր հատվածում, 250 մետր երկարություն եւ 5 մետր բարձրություն: