Արարատի զորամասերից մեկում անցած տարվա հունիսի 20-ին մահացած զինծառայող Գրիշա Խաչատրյանի գործից առանձնացված մասի դատաքննությունն ավարտվել է:
NEWS.am-ը Դատական տեղեկատվական համակարգից տեղեկացավ, որ գործով միակ մեղադրյալ սերժանտ Վարդան Կիրակոսյանի դատավճիռը կայացվել է. սերժանտը դատապարտվել է 2 տարվա ազատազրկման:
Նշենք, որ ըստ մեղադրական եզրակացության՝ Վարդան Կիրակոսյանն է մարտական դիրքում հայտնաբերել շարքային զինծառայող Գրիշա Խաչատրյանի դիակը եւ վերջինիս ամրակցված ինքնաձիգը: Անձնական շահագրգռվածությունից ելնելով`Վարդան Կիրակոսյանն անցել է պաշտոնեական լիազորությունների սահմանը եւ վերցրել դիակի կողքին եղած ինքնաձիգը: Այնուհետեւ սերժանտը հանել է պահատուփը, լիցքաթափել զենքը՝ դրանով իսկ խախտելով ինքնաձիգի իրական տեղադրությունը, պատշաճ չպահպանելով դեպքի վայրը եւ խոչընդոտ առաջացնելով իրավապահ մարմինների կողմից դեպքի իրական հանգամանքները բացահայտելու եւ մեղավոր անձանց պարզելու ուղղությամբ իրականացվելիք գործառույթների, ինչպես նաեւ նշված մարմինների գործունեության բնականոն ընթացքն ապահովելու համար:
NEWS.am-ին Քննչական կոմիտեի մամուլի ծառայությունից հայտնեցին, որ Գրիշա Խաչատրյանի գործով նախաքննությունը շարունակվում է:
Ավելի վաղ NEWS.am-ը հայտնել էր, որ հունիսի 20-ին, հայ-ադրբեջանական սահմանագոտու հարավ-արեւմտյան ուղղությամբ տեղակայված զորամասերից մեկի պահպանության տեղամասի մարտական հենակետում մահացու հրազենային գնդակային վիրավորում է ստացել ժամկետային զինծառայող, շարքային Գրիշա Մուրադի Խաչատրյանը (ծնվ. 1994թ., Սիսիանի զ/կ, 2013-1 զորակոչ): Ավելի ուշ պաշտպանության նախարար Սեյրան Օհանյանը լրագրողներին հայտնել էր, որ նախնական տվյալներով, Գրիշա Խաչատրյանը մահացու վիրավորում ստացել է զենքի օգտագործման կանոնները խախտելու հետեւանքով: Գրիշա Խաչատրյանի հարազատները պնդում են, որ նրան սպանել են: Գործով միակ կալանավորվածը սերժանտ Վարդան Կիրակոսյանն էր:
