Եթե իշխանությունը ուժ կիրառի Բաղրամյան պողոտայում, ցուցարարների թիվը մի քանի անգամ կավելանա: NEWS.am-ի թղթակցի հետ զրույցում նման տեսակետ է հայտնել «Ժառանգություն» կուսակցության փոխնախագահ Արմեն Մարտիրոսյանը:
«Երբ հունիսի 22-ի լույս 23-ի գիշերը նման ուժային գործողություն իրականացրին, հետո 5 անգամ ավելի շատ մարդ եկավ: Նման ակտիվություն ուժային գործողությունից հետո, իշխանությունները երեւի չէին սպասում: Իսկ հերթական «հինգով բազմապատկումը» նրանք միանշանակ չեն հաղթահարի»,-ասել է ընդդիմադիր գործիչը:
Նա նաեւ հավելել է, որ բացի այդ, փաստարկը, թե առանց Բաղրամյան պողոտայի քաղաքը կանգ է առնում, համոզիչ չի հնչում: «Պողոտան նախկինում էլ մի քանի անգամ փակվել է, երբ մենք փոխում էինք ասֆալտը «Լինսի» հիմնադրամի միջոցներով: Ոչ մի անլուծելի խնդիրներ քաղաքի համար չեն ծագել: Իսկ հիմա իրավիճակը արդարացնում է քաղաքացիական իրավունքների իրացումը»,-ընդգծել է Մարտիրոսյանը: