Այսօր՝ հունիսի 25-ի առավոտյան ՀՀ ոստիկանապետը Վլադիմիր Գասպարյանը Բաղրամյան պողոտայում առանձնացած երկար զրուցել է ՀԱԿ խմբակցության պատգամավոր Նիկոլ Փաշինյանի հետ (ֆոտոռեպորտաժ):
Այդ զրույցից հետո Նիկոլ Փաշինյանը ներկայացրեց իրենց զրույցի բովանդակությունը:
Նախ խեսք է եղել այն մասին, որ ոստիկանությունն ահազանգեր է ստացել, որ ցուցարարների մեջ ոգելից խմիչք օգտագործողներ են եղել: Նիկոլ Փաշինյանի փոխանցմամբ, այս գիշեր իր գտնված հատվածում նման դեպքեր չի նկատել:
«Խոսել ենք նաեւ լրագրողների դեմ բռնությունների մասին: Ես ասացի, որ լրագրողների մոտ հարց է ծագում՝ արդյոք դա հատուկ կազմակերպված չի եղել, որ ուղիղ եթերի տեսախցիկը թիրախ է դառնում: Գասպարյանը հավաստիացրեց, որ որեւէ նման կազմակերպված բան չկա, մյուս կողմից էլ բոլորին չի կարող վերահսկել:
Ես ասացի, որ դա շատ բացասական ազդակ է եւ կարեւոր է, որ լիարժեք պատասխաններ հնչեն, նա էլ ասաց, որ զուգահեռ երկու գործընթաց է գնում, ծառայողական քննություն է գնում, եւ ՀՔԾ-ում էլ քննություն է իրականացվում: Ասաց, որ վնասված գույքի մի մասը գտնվել է, մի մասը փոխհատուցվել է, որ մասը չի փոխհատուցվել, կփոխհատուցվի»:
Այնւոհետեւ Փաշինյանը հիշեց 2004-ի ապրիլի 12-ի իրադարձությունները, երբ լրագրողները էլի ոստիկանության հատուկ թիրախում էին: «Այն ժամանակ փոխոստիկանապետ Հովհաննես Վարյանը թիրախավորված բռնություն էր գործադրել «Հայկական ժամանակի» լրագրող Հայկ Գեւորգյանի նկատմամբ: Էլի նույն ձեռագիրն էր՝ չիպերը խլել էին: Այս անգամ էլ փոխոստիկանապետն է եղել կարծեմ»,-ասաց նա:
Անդրադառնալով Բաղրամյան պողոտայում ընթացող ակցիային, Փաշինյանն ասաց. «Այսօր շարժումն ուժեղացել է, դա ակնհայտ է: Այսօր քննարկում էինք, թե ովքեր են գալիս ակցիայի՝ կրթված, քաղաքակիրթ մարդիկ: Դա նրա արդյունքն է, որ նրանք ազդակ են ստանում, որ այստեղ քաղաքակիրթ պրոցես է ընթանում, դա շատ կարեւոր է»:
Նշենք, որ Ազատության հրապարակում «Ոչ թալանին» նախաձեռնության չորս օր տեւած նստացույցից հետո հունիսի 22-ին ավարտվել էր նախաձեռնության՝ իշխանություններին տված վերջնաժամկետը, եւ ցուցարարները մեծ բազմությամբ շարժվել էին դեպի Բաղրամյան պողոտա։ Ոստիկանները փակել էին պողոտան, ինչից հետո նստացույց էր սկսվել։ Հունիսի 23-ին վաղ առավոտյան ոստիկանները ջրցան մեքենայի օգնությամբ ցրել էին ցույցը, ապա բերման ենթարկել 237 ակտիվիստների եւ լրագրողների:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: