Ցուցարարները ոչ մի լուծման չեն հասնի, եթե շարունակեն փակել քաղաքի կարեւորագույն պողոտաներից մեկը։ Այս մասին հունիսի 25-ին կայացած Կառավարության նիստին հայտարարեց ՀՀ վարչապետ Հովիկ Աբրահամյանը՝ մեկնաբանելով էլեկտրաէներգիայի սակագնի թանկացման դեմ բողոքի ակցիան։
Նա ակտիվիստներին կոչ է արել ավելի կառուցողական լինել՝ հավելելով, որ Կառավարությունը պատրաստ է քննարկել ցանկացած հարց։ «Խանգարել քաղաքացիների ազատ տեղաշարժի իրավունքին՝ նշանակում է խախտել Սահմանադրությունն ու օրենքները։ Մեր ընկերներին կոչ եմ անում վերադառնալ կառուցողական դաշտ եւ քննարկել հարցերը, որոնք հուզում են մեր հասարակությանը»,- հավելեց վարչապետը։
Նա հիշեցրեց, որ Կառավարությունը արդեն հայտարարել է մի շարք միջադեպերով Ոստիկանության գործունեության հարցում ծառայողական քննություն անցկացնելու մասին։ «Հունիսի 23-ի առավոտյան Բաղրամյան պողոտայում կատարվածը առաջ բերեց հասարակության եւ Հայաստանի որոշ միջազգային գործընկերների բացասական արձագանքը։ Ոստիկանության կարգապահական հանձնաժողովը անելիք ունի։ Եվ հասարակությունը ակնկալում է օբյեկտիվ եւ թափանցիկ աշխատանք»,- ընդգծեց վարչապետը։
