Օշականում իր տունը այրած 48-ամյա Հայկ Մ.-ն վերջերս է բաժանվել կնոջից ու շատ ծանր է տանում այդ հանգամանքը: Այս մասին NEWS.am-ի թղթակցի հետ զրույցում ասաց Օշականի գյուղապետ Արամ Ներսիսյանը:
Նա նշեց, որ երբ հրդեհ է բռնկվել, տանտերը տանը չէր, հարեւաններն են փորձել հանգցնել, զանգել են հրշեջ ծառայություն, ինքը եւս մեկնել է դեպքի վայր: Գյուղապետն ասաց, որ մի հարկանի տուն էր, այրվել է մի ննջարանը, ինչպես նաեւ տանիքը, որի տակ խոտ կար: Ինքը՝ տանտերը, ամուսնացած է, ունի երեխա, սակայն ընտանիքում անհաշտություններ կային, մի քանի ամիս է՝ բաժանվել են: «Հարեւանները ասում էին, որ ծանր է տանում բաժանումը, չի բացառվում, որ ինքն էլ այրած լինի տունը»,-ասաց գյուղապետը:
Ավելի վաղ հայտնել էինք, որ հունիսի 24-ին, ժամը 17.45-ին, ոստիկանության Աշտարակի բաժնում հաղորդում է ստացվել, որ Օշական գյուղում տուն է այրվում: Ոստիկանության մամուլի ծառայությունից հայտնում են, որ ոստիկանության ծառայողների ձեռնարկած օպերատիվ-հետախուզական միջոցառումների շնորհիվ պարզվել է, որ նույն օրը, ժամը 17.40-ի սահմաններում, 48-ամյա Հայկ Մ.-ն հրկիզել է իր տունը: Պատճառված վնասի չափը պարզվում է: Հայկ Մ.-ն բերման է ենթարկվել ոստիկանության Աշտարակի բաժին և խոստովանել կատարածը: Կատարվում է հետաքննություն: