ԵԽԽՎ՝ Հայաստանի հարցով համազեկուցողներ Ակսել Ֆիշերը եւ Ալան Միլլը ոստիկաններին եւ ցուցարարներին կոչ են արել առավելագույն զսպվածություն ցուցաբերել, որպեսզի ապահովեն խաղաղ ցույցերի անխափան անցկացումը, որոնք չեն վերածվի բռնության, ինչպես դա եղել էր հունիսի 22-ի երեկոյան։
Նրանց խոսքով՝ պետք է գերակշռի խաղաղ ցույցի իրավունքը։ Համազեկուցողները ողջունել են բերման ենթարկված ակտիվիստներն ազատելը եւ ոստիկանների ոչ «Ոչ թալանին» շարժման ակտիվիստների միջեւ ձեռք բերած համաձայնությունը, որը հանգեցրել է Երեւանում իրավիճակի լարվածության թուլացմանը։
Միաժամանակ համազեկուցողները մտահոգություն են հայտնել լրագրողների դեմ հունիսի 22-ին դիտավորյալ բռնություն գործադրելու կապակցությամբ։ Այս պնդումները պետք է անաչառ եւ թափանցիկ կերպով հետաքննվեն,- հայտարարել են նրանք։
Համազեկուցողները Հայաստան այցի արդյունքները կներկայացնեն սեպտեմբերի 3-ին Սարաեւոյում ԵԽԽՎ մոնիթորինգային հանձնաժողովի նիստում։