Բաղրամյան պողոտայում նստացույցի մասնակիցների եւ ոստիկանության աշխատակիցների միջեւ փոքրիկ միջադեպ տեղի ունեցավ: Բանն այն է, որ Բաղրամյան պողոտայի նստացույցի հատված է մտել «Սանիտեքս» ընկերության աղբատար մեքենան եւ մի քանի երիտասարդներ դրոշով բարձրացել էին մեքենայի տանիք, ինչը առաջ էր բերել Երեւանի փոխոստիկանապետ Վալերի Օսիպյանի զայրույթը: (ֆոտոռեպորտաժ)
Նա հայտարարեց, որ դա վտանգավոր է թե տանիք բարձրացածների, թե ակցիայի մյուս մասնակիցների համար, հետեւաբար այսուհետեւ կարգելի որպեսզի «Սանիտեկ»-ի մեքենան մտնի այդ տարածք: Նա նաեւ նշել է, որ «Սանիտեկ»-ից բողոքել են ցուցարարների նման վարքի համար:
«Սրանից հետո ձեռքով կտանեք աղբը»,-վրդովված ասաց Օսիպյանը:
Ի պատասխան ակտիվիստները նշեցին, որ իրենք «Սանիտեկի» հետ պայմանավորվածություն են ունեցել, որ մեքենան գալուց առաջ իրենց պետք է տեղյակ պահեն, իսկ այս դեպքում՝ աղբատար մեքենան տարածք է մտել առանց իրենց գիտության եւ իմացության:
Մի փոքր բանավեճից հետո ամեն ինչ հարթվեց, եւ ցուցարարները խոստացան, որ այսուհետ ավելի ուշադիր կլինեն: