Հայաստանի իշխանությունները մի քանի ռուսաստանցիների բավարարելու համար կոտրում են հայ ժողովրդի արժանապատվությունը եւ երկիրը պահում սթրեսի մեջ։ Այս մասին այսօր լրագրողների հետ զրուցյում ասաց դերասանուհի Լալա Մնացականյանը, որը եկել է Բաղրամյան պողոտա՝ մասնակցելու բողոքի ակցիային։
Դերասանուհին հույս ունի, որ իշխանությունները վերջապես կկասեցնեն էլեկտրաէներգիայի սակագնի բարձրացման որոշումը,մ չնայած Հովիկ Աբրահամյանի հայտարարությունն այլ բան էր ասում։ «Կարծում եմ՝ այս պայքարը պետք է էմոցիոնալ դաշտից դուրս գա, մտնի իրավական դաշտ։ Կարող են նաեւ բանակցություններ լինել, թեկուզ նախագահի հետ բանակցությունների մեջ մտնեն։ Ամեն դեպքում այստեղ հավաքված են քաղաքացիներ, որոնք գիտեն, թե ինչ են ուզում»,- նշեց նա։
Այս պահին բողոքի ակցիան շարունակվում է, մասնակիցների թիվն անընդհատ ավելանում է։
Նշենք, որ հունիսի 23-ին վաղ առավոտյան ցուցարարների նկատմամբ ոստիկանության կիրառած ուժից հետո մարդիկ կրկին հավաքվել եւ ավելի մեծ քանակությամբ շարունակում են նստացույցը Բաղրամյան պողոտայում։
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: Քաղաքացիները հունիսի 22-ին երեկոյան 19:00-ից նստացույց են սկսել Բաղրամյան պողոտայում՝ պահանջելով անհապաղ կասեցնել էլեկտրաէներգիայի թանկացման վերաբերյալ հունիսի 17-ին Հանրային ծառայություննները կարգավորող հանձնաժողովի կայացրած որոշումը: