Արդեն ավանդույթի համաձայն, այսօր՝ հունիսի 26-ի առավոտյան՝ ժամը 8.30-ին Բաղրամյանի պողոտայի սկզբնամաս այցելեց ոստիկանապետ Վլադիմիր Գասպարյանը:
Դիտելով նստացույցի վայրը՝ նա հիշեցրել է հավաքվածներին, որ անհրաժեշտ է բոլոր ժամերին մաքրություն պահպանել:
Այնուհետեւ լրագրողների հետ զրույցում դիտարկմանը, թե ցուցարարները համաձայն են իշխանության հետ գնալ երկխոսության, եթե ապահովվի ուղիղ եթեր, Վլադիմիր Գասպարյանն արձագանքեց. «Նորից «եթե» պահանջներ: Երկրի նախագահին պահանջներ չեն դնում, ընդունում են: «Եթե այսպես, ապա այնպես»-ով չի լինում, այդպես արդար չի: Երկրի քաղաքացին երկրի նախագահին, գերագույն գլխավոր հրամանատարին, երբ կանչում է երկխոսության, չեն ասում՝ այսպես կլինի, կամ այնպես կլինի»:
Հարցին, թե երկրի քաղաքացին է նախագահին ընտրում, ինչո՞ւ չի կարող պահանջել, ՀՀ ոստիկանապետը ժպտաց, դադար տվեց ու պատասխանեց. «Եթե հարցը գնում է կոնկրետ խնդիրը լուծելուն, երբ երկրի նախագահը ձեռք է մեկնում 1 օր, երկու օր, իսկ նրան ասում են կամ այսպես կլինի, կամ այսպես չի լինի, խոսում է այն մասին, որ դեռ չկա ծրագիր եւ չկա դեռ խոսելու բան»:
Հիշեցմանը, թե իշխանությունները ժողովրդի ծառաներն են, նա նշեց. «Եկեք էս բառակապակցությունների հետևից չընկնենք՜ իշխանությունները ծառաներ են, այսինչ են, այնինչ են… Մենք ծառա չենք, մենք ծառայում ենք: Վա՛յ նրան, ով մեզ նոքարի տեղ կդնի»: