2014թ. «Արարատբանկը» միջազգային վարկերը մեծացրել է 40 տոկոսով։ Այս մասին ասված է հունիսի 26-ին Երեւանում ներկայացված բանկի ամենամյա ֆինանսական հաշվետվության մեջ։
2014թ. վերջին միջազգային ֆինանսական կազմակերպությունների եւ ռեզիդենտ բանկերի միջոցները բանկի պարտավորություններում կազմել են 40 մլրդ 368 մլն դրամ կամ 34.6 տոկոս։ Հաճախորդների ընթացիկ հաշիվներն ու ավանդները կազմել են 65 մլրդ 810 մլրդ դրամ կամ 56.4 տոկոս։ Մասնավորապես էականորեն աճել են ֆիզիկական եւ իրավաբանական անձանց ցպահանջ ավանդները՝ համապատասխանաբար 27.8 տոկոս եւ 70.7 տոկոս, ինչպես նաեւ իրավաբանական անձանց ժամկետային ավանդները՝ 81.4 տոկոս։ Ընդհանուր առմամբ անցյալ տարվա վերջին բանկի պարտավորությունները կազմել են 116 մլրդ 694 մլն դրամ, ինչը 10.5 տոկոսով շատ է, քան 2013թ.։ 2014թ. բանկի սեփական կապիտալը կազմել է 21 մլրդ 669 մլն դրամ, ինչը 10.4 տոկոսով ավել է, քան 2013թ.։
Հիշեցնենք, որ «Արարատբանկ» ԲԲԸ-ի բաժնետերերն են «Ֆլեշ» ՍՊԸ-ն, (64,24%), Վերակառուցման եւ զարգացման եվրոպական բանկը (25%) եւ Rural Impulse Fund II SA ընկերությունը։