Հակառակորդի կրակոցից զոհված զինածառայող, Անգեղակոթի 28-ամյա բնակիչԱրման Եփրեմյանին հուղարկավորելու են զինվորական կարգով հարազատ գյուղի պանթեոնում: Այս մասին այսօր՝ հունիսի 27-ին, NEWS.am-ի հետ զրույցում ասաց Արման Եփրեմյանի հարազատներից Արամայիս Սարգսյանը՝ հավելելով, որ Արմանին հուղարկավորելու են երկուշաթի:
«Տեղյակ ենք, որ Երևանից զինվորական պաշտոնյաներ են գալու, բայց կոնկրետ չգիտեմ՝ ովքեր: Արմանն այնքան հերոս տղա էր, որ գնաց ծառայելու` մտածելով, որ գոնե մի բանով օգտակար լինի հայրենիքին: Շատ հայրենասեր էր, դրա համար էլ չկարողացավ մնալ գյուղում, աշխատել, գնաց սահման»,-ասաց նա:
Արամայիս Սարգսյանը տեղեկացրեց, որ Արմանը ուներ քույր և եղբայր. «Քույրն ու եղբայրն ամուսնացած են, ինքը իր կնոջ, երկու երեխաների, հոր ու մոր հետ էր ապրում: Գյուղացի խելոք, աշխատասեր մարդիկ են, օրվա հացը տանջանքով վաստակող: Արմանն էլ մինչև ծառայության մեկնելը հովվություն էր անում, ամեն ինչով օգնում էր հորն ու մորը»,-ասաց նա:
Ավելի վաղ հայտնել էինք, որ հունիսի 26-ին, ժամը 18:30 սահմաններում հակառակորդը ՀՀ Նախիջեւանյան սահմանի Սյունիքի մարզի Գորհայք բնակավայրի հայկական դիրքերի ուղղությամբ, կիրառելով նաեւ մեծ տրամաչափի զենքեր, ակտիվ կրակ է վարել: Հայկական կողմի պատասխան կրակից հետո հակառակորդը կրել է բազմաթիվ կորուստներ, սակայն մարտի ընթացքում ցավոք զոհվել է նաեւ ՀՀ ԶՈւ զինծառայող, շարքային պայմանագրային Արման Մայիսի Եփրեմյանը, ծնված 1987թ:
