Գյումրիի Թատերական հրապարակում ընդդեմ էլեկտրաէներգիայի սակագնի բարձրացման բողոքի նստացույցը շարունակվում է: Մոտ 100 ցուցարարներ հետեւում են Երեւանի իրադարձություներին, որպեսզի որոշեն իրենց հետագա անելիքները:

NEWS.am-ի Գյումրիի թղթակիցը հաղորդում է, որ Թատերական հրապարակում մեծ թվով ոստիկաններ եւ հոգեւորականներ կան: Հրապարակում են նաեւ Կումայրու բաժնի պետ Արթուր Հակոբյանը, մարզի փոխոստիկանապետ Աշոտ Գրիգորյանը եւ Շիրակի մարզի հոգեւոր առաջնորդ Միքայել Եպիսկոպոս Աջապահյանը, նաեւ մի խումբ փաստաբաններ:

Նշենք, որ Թատերական հրապարակում ոստիկանները քառակի անգամ շատ են ցուցարարներից: Հրապարակում մեծ թվով ոստիկանական մեքենաներ կան:

Հիշեցնենք, որ Երեւանում ընթացող բողոքի ակցիաներին եւ նստացույցին զուգահեռ Հայաստանի տարբեր մարզերում նույնպես ակցիաներ են կազմակերպվել:

Հունիսի 23-ի երեկոյան ժամը 19:00-ից քաղաքացիները հավաքվել են Բաղրամյան պողոտայում, փակել այն եւ պահանջում են կասեցնել հունիսի 17-ին կայացրած որոշումը:

Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ  կՎտ/ժ-ի դիմաց 41.85 դրամից դառնալով 48.78 դրամ։  «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: