Թայվանի ակվապարկում հունիսի 27-ին, ներկերի փառատոնի ժամանակ տեղի ունեցած պայթյունի եւ դրան հետեւած հրդեհի առաջին զոհը 20-ամյա աղջիկ է եղել, որի մաշկի 90 տոկոսն այրվել էր: Այս մասին հաղորդում է «Ֆենիքսը»:

Վերջին ճշտված տվյալների համաձայն, ընդհանուր առմամբ հրդեհից տուժել է 498 մարդ, ոչ թե 516, ինչպես հաղորդվել էր ավելի վաղ: Ներկայումս տուժածները գտնվում են 43 հիվանդանոցներում, հաղորդում է «Սինհուան»: Ըստ այդմ, 79 մարդ թեթեւ վնասվածք է ստացել, 157-ը՝ միջին ծանրության, իսկ 202 մարդ՝ ծանր:

Ավելի վաղ NEWS.am-ը հաղորդել էր, որ Թայվանի այգիներից մեկում պայթյուն է որոտացել, որի հետեւանքով շատերի մոտ մինչեւ 40 տոկոս այրվածքներ կան։

Բռնկումն ու պայթյունը եղել են Սինբեյ քաղաքի այգում։

Դեպքը եղել է այն վայրում, որտեղ ընթանում էր Color Play Asia ներկերի փառատոնը։ Ականատեսների վկայությամբ, ինչ-որ փոշու մեծ քանակություն օդ է նետվել, ապա պայթյուն է  եղել։ Պայթյունի պատճառները դեռ չեն պարզվել, իշխանությունները հետաքննություն են իրականացնում։