«Ինտեր ՌԱՕ» ընկերությունը չի հաստատել լրատվամիջոցներում հայտնված լուրերն այն մասին, որ ընկերությունը մտադիր է վաճառել Հայաստանի իր ակտիվները։ Այս մասին հայտնում է ՏԱՍՍ-ը՝ վկայակոչելով ռուսական էներգետիկ հոլդինգի պաշտոնական ներկայացուցչին։
«Մենք չենք հաստատում ընկերությունը վաճառելու մասին լուրերը»,-ասել է գործակալության զրուցակիցը։
Հիշեցնենք, որ ավելի վաղ Կոմերսանտը», վկայակոչելով իր վստահելի աղբյուրները, հայտնել էր, որ ռուսական «Ինտեր ՌԱՕ» ընկերությունը, որը «Հայաստանի էլեկտրական ցանցեր» ընկերության սեփականատերն է, պատրաստ է վաճառել ՀԷՑ-ը՝ այն ազգայնացնելու Երեւանից հնչող հայտարարությունների ֆոնին:
Պարբերականի տվյալներով, ընկերությունն արդեն բանակցություններ է վարել «Տաշիր» ընկերությունների խմբի նախագահ Սամվել Կարապետյանի եւ «այլ ռուսաստանցի այլ հայ գործարարների հետ»:
Հունիսի 22-ից քաղաքացիները հավաքվել են Բաղրամյան պողոտայում, փակել այն եւ պահանջում են կասեցնել հունիսի 17-ին կայացրած որոշումը: Հունիսի 28-ին ցուցարարների մի մասը հեռացել էր Ազատության հրապարակ, իսկ մեծ մասը մնացել էր Բաղրամյան պողոտայում։ Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով: