Ֆրանսիան Հունաստանի ճգնաժամի հնարավոր հետեւանքների վերաբերյալ մտահոգություններ չունի։ Այս մասին Հունաստանի հարցով Ելիսեյան պալատում հրավիրված արտակարգ խորհրդակցության ավարտին հայտարարել է Ֆրանսիայի նախագահ Ֆրանսուա Օլանդը։
«Վերջին 4 տարիների ընթացքում իրավիճակը էական փոխվել է։ Այսօր Ֆրանսիայի տնտեսությունն առավել կայուն է։ Մենք վախենալու պատճառ չունենք»,-ասել է Օլանդը։
Միաժամանակ Փարիզի բորսան բացման պահին ավելի քան 4 տոկոսով վնաս է կրել։ Սակարկությունների ընթացքում հաջողվել է հետ բերել բաժնեմասների գների կորուստները։ Այս պահին Credit Agricole-ի արժեթղթերի գինը 4.2 տոկոսով նվազել է։ BNP Paribas-ի արժեթղթերը էժանացել են 4,5%, իսկ Societe Generale-ը՝ 3,5%։
Ելիսեյան պալատում իր ելույթի ժամանակ Օլանդը ընդգծել է, որ հուլիսի 5-ի հանրաքվեից է կախված եվրոգոտուն Հունաստանի անդամակցության հարցը, փոխանցում է ՏԱՍՍ-ը։
«Ֆրանսիան ցանկանում է, որպեսզի Հունաստանը մնա։ Բացի այդ, դեռեւս հույս կա, որ Հունաստանի եւ միջազգային վարկատուների միջեւ համաձայնություն կկնքվի»,- ասել է Ֆրանսիայի նախագահը եւ ափսոսանք հայտնել, որ Աթենքը որոշել է միակողմանի կարգով դադարեցնել վարկատուների հետ բանակցությունները։
«Այդ բանակցությունները միայն Հունաստանին չէին վերաբերում, այլ եվրոգոտու բոլոր երկրներին։ Մենք մոտ էինք համաձայնության գալուն։ Ցավում եմ Աթենքի ընտրության համար»,-ասել է Օլանդը։
Հիշեցնենք, որ Հունաստանը հունիսի 26-ին լքել էր վարկատուների բանակցությունները։ Հունիսի 27-ին Եվրախումբը արտահերթ նիստում արձանագրել էր բանակցությունների դադարեցման փաստը։ Օգնության ծրագիրը կավարտվի հունիսի 30-ին, եւ Աթենքը 1.6 մլրդ եվրո պարտքը մարելու համար տարկետում չի ստանա։