Էլեկտրաէներգիայի սակագնի բարձրացման հետ կապված հասարակական ակտիվության վերջին օրերին ռեժիմը նոր թափ է հաղորդել Ժիրայր Սէֆիլյանի նկատմամբ հալածանքին: Այս մասին հաղորդագրություն է տարածել «Հիմնադիր խորհրդարանը»:
Հայտարարությունում նաեւ ասվում է.
«Այդ նպատակով գործի են դրվել տեղեկատվական եւ վարչական բոլոր լծակները՝ Ժ. Սէֆիլյանին անհայտ մեղքեր վերագրելու եւ նրա կերպարը հրեշացնելու համար:
Մասնավորապես՝ հունիսի 28-ին, երբ Բաղրամյան պողոտայում իրավիճակը խիստ լարված էր եւ կար վտանգ, որ ոստիկանությունն իրեն բնորոշ ապօրինի եւ ուժային եղանակով բռնություն կկիրառի խաղաղ ցուցարարների նկատմամբ, ոստիկանության ղեկավարները եւ ռեժիմին ենթակա քարոզչամեքենան լրատվամիջոցներով, սոցիալական ցանցերում եւ առանձին անհատների միջոցով լուրեր էին տարածում, որ Ժիրայր Սէֆիլյանը սադրիչ է եւ նա է կազմակերպել Բաղրամյանի հավաքը քաղաքական շահաբաժին ստանալու համար: Եվ այդ ամենն արվում էր այն նպատակով, որպեսզի ոստիկանության բռնությունների հավանական զոհերի համար մարդիկ մեղադրեին Ժ. Սէֆիլյանին:
Բացի այդ՝ վերջին շրջանում ոստիկանական եւ քաղաքացիական հագուստով մարդիկ ավտոմեքենաներով եւ հետիոտն ամենուրեք հետեւում են Ժ. Սէֆիլյանին, նրա տեղաշարժի մասին զեկուցում հեռախոսներով, իսկ երեկ երեկոյան քաղաքացիական հագուստով անհայտ անձինք մի քանի ավտոմեքենաներով հետապնդել են նրան եւ ամբողջ գիշեր հերթապահել նրա բնակարանի շրջակայքում»: