ՌԴ նախագահ Վլադիմիր Պուտինը Կրեմլում ընդունել է Սիրիայի Արաբական Հանրապետության արտգործնախարար Վալիդ Մուալեմին։ Նրանք մասնավորապես քննարկել են Սիրիայում տիրող իրավիճակը եւ միջազգային ահաբեկչության դեմ պայքարը, հայտնում է Կրեմլի պաշտոնական կայքը։
«Հասկանում ենք, որ նման իրավիճակը միշտ ուղեկցվում է որոշակի խնդիրներով, կարող են լինել նաեւ ռազմական անհաջողություններ։ Սակայն մենք վստահ ենք, որ վերջին հաշվով Սիրիայի ժողովուրդը կհաղթի։ Սիրիային, Սիրիայի ղեկավարությանն ու Սիրիայի ժողովրդին աջակցելու մեր քաղաքականությունն անփոփոխ է։ Միաժամանակ մենք կարծում ենք, որ արմատականության եւ ահաբեկչության դեմ պայքարելու համար անհրաժեշտ է միավորել տարածաշրջանի բոլոր երկրների ջանքերը։ Մենք կոչ ենք անում մեր բոլոր բարեկամներին անել ամեն բան ահաբեկչության դեմ պայքարում շահագրգիռ բոլոր երկրների հետ կառուցողական երկխոսություն վարելու համար»,- նշել է Պուտինը։
Մուալեմը իր հերթին նշել է, որ ահաբեկչության դեմ պայքարում հարեւան երկրների կոալիցիա ստեղծելու համար մեծ ջանքեր են պահանջվում։ «Ինչպես Դուք գիտեք, մեր երկրում հիմնական խնդիրն այն է, որ այդ հիշատակած երկրները աջակցում են մեր երկրի տարածքում գործող ահաբեկիչներին։ Մենք պատրաստ ենք, հիմնվելով Ձեր ջանքերի վրա, համատեղ աշխատել ահաբեկչության դեմ։ Այդ պատճառով մենք հույսեր ենք կապում Ձեր աջակցության հետ»,-ասել է արտգործնախարարը։
