Ինֆորմացիոն տեխնոլոգիաների ձեռնարկությունների միությունը (ԻՏՁՄ) եւ «Քրոնիմետ» բարեգործական հիմնադրամը նախաձեռնել են Digicode կիրառական ծրագրավորման պատանեկան մրցույթը: Հունիսի 27-ին Հայաստանի ամերիկյան համալսարանում անցկացվեց մրցույթի եզրափակիչ փուլը՝ ՀԱՀ-ի աջակցութամբ:
DigiCode մրցույթի նպատակն է դպրոցականների շրջանում խթանել կոդավորման նկատմամբ հետաքրքրությունը, զարգացնել ալգորիթմային մտածողությունը եւ ստեղծագործականությունը, ինչպես նաեւ բացահայտել տաղանդավոր պատանիներին եւ աղջիկներին:
DigiCode կիրառական ծրագրավորման պատանեկան մրցույթի մասակիցներն աշխատում են Scratch (Աղվես) եւ K-Turtle (Կրիա) ծրագրավորման լեզուներով եւ ստեղծված խաղերը բեռնում են Մասաչուսեթսի(MIT) համալասրանի կայք: Scratch-ը Մասաչուսեթսի տեխնոլոգիական համալսարանի կողմից մշակված գրաֆիկական ծրագրավորման միջավայր է, իսկ Աղվեսը Scratch ծրագրի հայաֆիկացված եւ նոր մոդուլներով համալրված տարբերակն է, որը կիրառվում է նաեւ ռոբոտներ ծրագրավորելիս: Այս ծրագրերը դեռեւս 2013 թ. կիրառվում են ավելի քան 800 աշակերտի կողմից, ովքեր ներգրավված են «Ռոբոտաշինությունը սկսվում է դպրոցից» ծրագրում:
Կազմակերպիչ՝ ԻՏՁՄ գործադիր տնօրեն Կարեն Վարդանյանը ընդգծում է. «ԻՏՁՄ-ն խրախուսում է տեխնոլոգիական գիտելիքների կիրառումը դպրոցներում եւ մշակել է հատուկ ծրագիր: Այսօր ՀՀ տարբեր մարզերում մենք արդեն ունենք 50-ից ավելի ինժեներական խմբակ եւ շուրջ 15 ինժեներական լաբորատորիա, սակայն դրանով չենք սահմանափակվում, այլ ցանկանում ենք, որպեսզի ՀՀ բոլոր դպրոցներում նման խմբակներ ստեղծվեն: Սա է այն ճանապարհը, որով փորձում ենք դպրոցականներին ներգրավել ինժեներության մեջ, որի շնորհիվ փոխվում է երեխաների մտածողությունը եւ սպառողից դառնում են արտադրող»:
DigiCode մրցույթի գլխավոր հովանավոր «Քրոնիմետ» բարեգործական հիմնադրամի փոխտնօրեն Դիանա Ավդալյանը նշում է. «Տպավորված եմ աշակերտների ցուցաբերած արդյունքներով: Կարող ենք վստահությամբ ասել, որ ՏՏ ոլորտում երեխաներն արդեն մեծ հաջողություն են արձանագրում: Նրանք ուղղակի հիանալի աշխատանքներ են ցույց տալիս եւ ապացուցում, որ ընտրված ուղղությունը ճիշտ է»:
8-16 տարեկան մասնակիցներն իրենց աշխատանքներով ապշեցրին ոչ միայն կազմակերպիչներին, այլ նաեւ ժյուրիի կազմին, որոնք բարդ խնդրի առջեւ էին կանգնել՝ լավագույններին ընտրելիս: Հաղթող մասնակիցների ցանկը հրապարակվել է մրցույթի կայքում:
Նշենք, որ պատանեկան ծրագրավորման մրցույթն առաջին անգամ էր անցկացվում ու աննախադեպ մեծ հետաքրքրություն էր առաջացրել դպրոցականների շրջանում. մրցույթին դիմել էին ավելի քան 200 պատանի ՀՀ բոլոր մարզերից: Նախնական փուլը հաղթահարած բոլոր 45 մասնակիցները (Երեւանից՝ ընդամենը մեկ մասնակից) ստացան խրախուսական մրցանակ: Իսկ եզրափակիչ փուլի հաղթողները ստացան նաեւ այլ արժեքավոր մրցանակներ. մասնավորապես՝ դրամական պարգեւներ, դասընթացի մասնակցության եւ ՏՏ ընկերությունում պրակտիկայի հնարավորություն, ինովացիոն ճամբարի ուղեգրեր, սարքավորումներ, ռոբոտի դետալներ եւ այլն: