Նյու Դելիի խստացված ռեժիմի գաղութից երկու բանտարկյալներ փախել են՝ թունել փորելով եւ անցնելով պատի վրայով: Այս մասին գրում է France Press-ը՝ վկայակոչելով իշխանությունների պաշտոնական հաղորդագրությունը:
Նրանք փախել են Ասիայի ամենամեծ՝ Տիհար բանտից: Ոստիկաններին հաջողվել է բռնել եւ հարցաքննել հանցագործներից մեկին: Բանտում նա սպասում էր գողության գործով դատավճռին:
Բանտապահներն ահազանգ են հնչեցրել կիրակի, առավոտյան ստուգման ժամանակ հայտնաբերելով բանտարկյալների բացակայության փաստը: The Times of India-ի փոխանցմամբ, հետաքննություն է տարվում՝ պարզելու համար, թե նրանց ինչպես է հաջողվել անցնել զինված պահապանների եւ տեսահսկող համակարգի մոտով:
Տիհար բանտը նախատեսված է ռազմական հանցագործների, մաֆիայի անդամների, կրկնահանցագործների համար: Ներկայում, սակայն, այն լեփ-լեցուն է: 2013 թվականի տվյալներով, 6.520 մարդու համար նախատեսված բանտում ներկայում ավելի քան 13.500 կալանավոր կա:
